Hevpeyvîn ligel Christian Thoning, Danîmarkîyekî ku fêrî Kurdî bû.

Ji aliyê Deniz Serinci ve

”Çi dikî, rind î?” Christian Thoning ji min dipirse, gava ez wî cara yekem li rawestgeha trênê ya Kopenhagê dibînim.

”Baş im, spas, tu çi dikî?” ez bersiv didim.

Di eynî demê de ez şaş dimînim, ji ber ku mêrekî Danîmarkî dibînim ku bêyî aksan û bêyî xete zimanê min diaxive.

”Elhamdulîllah, ez jî baş im,” Christian bersiv dide.

20 sal berê Christian derbasî Îslamê bûye û di nav Misilmanan de wekî Şakir tê naskirin. Ne cara yekem e ku ez Ewropayekî dibînim ku bûye Misilman. Gellek Ewropî hene ku bûne Misilman, lê cara yekem e ku ez Ewropiyekî dibînim ku hema bûye Kurd jî.

Christian, ku normalî di nexweşxaneya Kopenhagê de wekî barkêş kar dike, ev 12 sal in ku bi jineke kurd re zewicî ye. Hevjîna wî Kurdeke ji Konyaya Anatoliya Navîn e. Sê zarokên wan hene.

Christian herwiha fêrî lêxistina enstrûmenên kurdî jî bûye, wekî teblik, zirne û ney û bêguman govend ji digire.

Tu çawa fêrî kurdî bûyî?

Bi xwe ez fêrî kurdî bûm, di kolanan de. Di 14-15-saliya xwe de min ligel ecnebiyên Kopenhagê futbol dileyîst û zû fêrî hevokên nû bûm. Min ew hevokên nû qeyd kirin û ji bîra min naçin.

Çend sal in tu bi kurdî diaxivî?

24 sal bûn. Ji sala 1989ê heta îro.

Kîjan zimanên din dizanî?

Erebî, kurdî, tirkî, danîmarkî, spanî, îngilizî, almanî, hindik farsî û hindik sirbî-krovatî.

Di fêrbûna kurdî de zehmettirîn tişt çi bû?

Rêzimana kurdî. Ez bi sedema kesan fêrî kurdî bûm. Ji ber vê kurdiya min ne li gorî rêziman e. Herwisa ez dibînim ku di gellek waran de kurdî wek zimanên ewropî ye.

Çawa?

Mînak bidim. No = na, mine = min, you/thou = tu, brother = bira/birader, lip = lêv, eggs = hêk, name = nav, month = mang/meh.

Tu li malê ligel hevjîna xwe bi kurdî diaxivî?

Na, tenê wexta em şerê hevdu dikin (dikene). Em bi pirranî bi danîmarkî diaxivin.

Tu qet çûyî gundên Kurdan li Konyayê?

Du caran ez çûme gundê hevjîna xwe. Jin hemû şaş man ku ez bi kurdî dizanim; ”Weeey, Christian bi kurmancî deng dike!” wan got.

Li Kurdên ku te dît, tiştekî hevbeş hebû?

Bêgûman hebû. Ew hemû pirr mêvanperwer bûn. Ji min re pêşniyara tiştên ewqasî biha kirin ku pereyê wan tine bû ku bidin min. Û hertim çay vexwarin. Herwiha jî ji ahengan pirr hez dikin. Di dawî de ez baş bûm di govendê de. Bi rastî asan e: Tu gav pêş, yek paş û guhdariya rîtmê bike.

Hevpeyvîna ligel Christian wexta ku Kurdî diaxive

Kommentér via Facebook

kommentarer