Bi merema nirxandin û şirovekirina rewşa niha ya Herêma Kurdistan û Iraqê, herwiha rewşa parçeyên din yên welat, semînarek li bajarê Ishøj ya Danmarkê ji bo Berpirsê Pêwendiyên Partiya Demokrat a Kurdistanê Hêmin Hewramî hate li darxistin.

Diyar Molayî

Piştî nîvroya îro 04.05.2013’an li bajarê Ishøj a Danmarkayê ku peyamnêrê jiyan.dk jî têde beşdar bû, Berpirsê Pêwendiyên Partiya Demokrata Kurdistanê (PDK) Hêmin Hewramî di semînarekê de basê rewşa Herêma Kurdistan, rewşa Rojava û bakurê Kurdistanê û herwiha pêwendiyên navbera Hewlêr û Bexdayê kir.

Hewramî di beşekî axaftina xwe de pêwendiyên navbera Hewlêr û Bexdayê bi aloz da zanîn û diyar kir ku heya niha jî kurd di riya rizgariyê de ne û heya niha jî demokrasî di qonaxa destpêka xwe de ye û gelê me di bin gefan de ye.

Sebaret bi pêwendiyên navbera desthilat û opozîsyonê li Herêma Kurdistanê Himên Hewramî xuya kir ku, ew hertim dixwezin pêwendiyan xweş bikin û anî ziman ku niha pêwendiyên desthilat û opozîsyonê ne pêwendiyên salim in.

Navbirî herwiha basê rewşa Rojavayê Kurdistanê kir û amadebûna partiya xwe bo her alîkariyekê bi wî beşê welat ragehand.

Rewşa pêvajoya aştiyê li Tirkiye û bakurê Kurdisranê tewerek din ya axaftinên Hewramî bû, ku têde navbirî piştevaniya partiya xwe bo diyaloga di navbera PKK û AKP de anî ziman.

Beşa dawiyê ya axaftina berpirsê Pêwendiyên PDK li ser sîstema hikimraniya li Iraqê, rewşa deverê û Kurdistanê bû.

Civîna han bi pirsên beşdaran û bersiva birêz Hewramî bi dawî hat.

Hêjayî gotinê ye ku semînara han ji aliyê lêjneya nawçeya Danmarkê ya Partiya Demokrata Kurdistanê (PDK) hatibû pêkanîn.

Kommentér via Facebook

kommentarer